Оңтүстік Қазақстан облысында сәуірде инвестициялық форум өтеді

25 Марта 2016 1384 ИнвестициялықФорум, ОңтүстікҚазақстан

Алматы. 25 наурыз. Ақпараттар орталығы. «Ontustik Invest — 2016» форумы осы жылдың 28-29 сәуірі күндері Оңтүстік Қазақстан облысында өтеді, деп хабарлады облыс әкімінің орынбасары Сапарбек Тұяқбаевқа сілтеме жасаған баспасөз қызметінен.
Хабарда айтылғандай, аталмыш форум аясында шетелдік қатысушылар еліміздің, оның ішінде, Оңтүстік Қазақстан облысының инвест мүмкіндіктерімен танысып, өңіріміздің экономикадағы басым бағыттары – ауыл шаруашылығы, тамақ және тоқыма өнеркәсібі, фармацевтика салалары аясындағы маңызды мәселелерді талқылайды.
Форум екі жақты әріптестік орнату мен іскерлік байланысты нығайтуда шетелдік инвесторлар мен жергілікті кәсіпкерлердің, мемлекеттік орган өкілдері мен ұлттық компаниялардың іскерлік алаңына айналады..
«Ауыл шаруашылығы, тамақ және жеңіл өнеркәсіп, фармацевтика салалары біздің өңір үшін маңызды тақырып. Себебі, бұл салалар басқа өңірлермен, елдермен салыстырғанда біздің аймақта жақсы дамыған», — деді С. Тұяқбаев.
Сондықтан, шенеуніктің пікрінше, өңірге шетелдік инвесторлардың қызығушылық танытуы заңдылық..
«Мәселен, көршілес Қытай мемлекетінде біздегі органикалық таза, сапалы тағамдар жоғары сұранысқа ие. Ондағы баға ұсынысы да біздің кәсіпкерлердің көңілінен шығады», — деп атап өтті әкім орынбасары.
Хабарда айтылғандай, инвестициялық форумға шетелдік компаниялар мен халықаралық ұйымдардың өкілдері, сонымен қатар, бизнес-қауымдастықтар, орталық және жергілікті орган қызметкерлері мен ұлттық компаниялар, даму институттарының мамандары, жалпы саны 500-ден астам өкіл қатысады деп күтілуде.